Unë jam një biologe molekulare dhe strukturore entuziaste për të kontribuar në mësimdhënie dhe në kërkim shkencor. Aktualisht, punoj si Asistente Lektore në Universitetin e Ballkanit Perëndimor në Tiranë, Shqipëri, ku jam e përkushtuar për të ofruar leksione të cilësisë së lartë dhe për të zhvilluar programe mësimore për Departamentin e Teknologjisë dhe Biznesit. Gjithashtu, punoj si Specialiste e ADN-së në Qendrën e Forensikës “Forensic Center Albania - FCA”, duke aplikuar ekspertizën time në analizën e ADN-së për përcaktimin e atësisë dhe lidhjeve farefisnore, duke ofruar konsulencë në çështjet gjyqësore civile dhe kriminale. 

Rruga ime akademike filloi me një Bachelor Shkencash në Bioteknologji nga Universiteti i Tiranës, e ndjekur nga një Master Shkencash në Diagnostikë Molekulare dhe Bioteknologji nga “Università degli Studi di Camerino”, Itali. Aktualisht, jam duke përfunduar doktoraturën në Biologji Molekulare dhe Biomjekësi në “Universidad del País Vasco”, Spanjë. Kërkimi im gjatë doktoraturës, i zhvilluar në CIC bioGUNE, fokusohet në dinamikën strukturore të sintezës së proteinave duke përdorur teknika të avancuara si NMR, X-ray crystallography dhe cryo-EM. Gjatë doktoraturës kam fituar përvojë të gjerë laboratorike, duke zotëruar teknika të ndryshme të biologjisë molekulare, përfshirë klonimin, mutagjenezën, PCR dhe transkriptimin-traslatimin in vitro. Gjithashtu, kam krijuar eksperiencë në metoda biokimike si shprehja dhe purifikimi i proteinave dhe komplekseve të ndryshëm ribozomalë, si dhe teknikat a parapërmëndura të biologjisë strukturore. 

Në rolin tim në Qendrën e “Forensic Center Albania - FCA” përdor teknika të biologjisë molekulare për të sekuencuar dhe krahasuar profilet e ADN-së njerëzore, duke siguruar rezultate të sakta dhe të besueshme për hetimet kriminalistike. Ky rol ka përmirësuar më tej aftësitë e mia në analizën e ADN-së, interpretimin statistikor dhe rigorozitetin shkencor të nevojshëm për aplikimet kriminalistike dhe jo vetëm. Përvoja ime në këtë fushë sjell një vlerë të shtuar në fushën akademike dhe të kërkimit shkencor, duke kontribuar në zhvillimin e metodave të reja kërkimore dhe të proceseve të mësimdhënies me njohuri të thelluara dhe praktike nga fusha e forensikës molekulare. 

Jam pjese e disa publikimeve shkencore dhe kam prezantuar kërkimet e mia në konferenca ndërkombëtare, duke treguar gjetjet e mia mbi komplekset ribozomale dhe mekanizmat e rezistencës ndaj antibiotikëve. 

Njoh disa gjuhë, përfshirë shqipen, anglishten, italishten dhe spanjishten, dhe zotëroj një gamë të gjerë aftësish që përfshijnë përshtatshmërinë, zgjidhjen e problemeve, të menduarit kritik dhe komunikimin efektiv. Përkushtimi im për mësimdhënien dhe kërkimin shkencor nënvizon angazhimin tim për të avancuar komunitetin akademik dhe shkencor.