Prof. Assoc. Dr. Elizabeta Susaj është personel akademik me kohë të plotë pranë Departamentit të Teknologjisë dhe Biznesit, Fakulteti i Ekonomisë, Teknologjisë dhe Inovacionit, Western Balkans University. Prof. Susaj është anëtare e Njësisë së Sigurimit të Brendshëm të Cilësisë, si dhe këshilltare akademike dhe koordinatore e programit “Master i Shkencave” në Nanoteknologji, 

Ajo është diplomuar në vitin 1989 në Fakultetin e Bujqësisë, Universiteti Bujqësor i Tiranës, ku ka kryer gjithashtu edhe studimet pasuniversitare dhe ka marrë titullin “Master Shkencor” në Hortikulturë (2003). Më pas, ka kryer studimet pasuniversitare në Mediterranean Agronomic Institute of Chania - MAICh, Kretë, Greqi, një ndër katër institutet e Qendrës Ndërkombëtare për Studime të Avancuara Agronomike Mesdhetare, me qendër në Paris, Francë, ku ka marrë titullin “Master Shkencor” në “Gjenetikën e Hortikulturës dhe Bioteknologji” (2004), njehsuar nga Ministria e Arsimit, Rinisë dhe Sporteve (2009). Në vitin 2006, ka mbrojtur gradën “Doktor i Shkencave” në Fushën e Bujqësisë, dhe nga viti 2014 mban titullin akademik “Profesor i Asociuar”. 

Prof. Susaj ka një eksperiencë të gjatë profesionale e shkencore në fushën e bujqësisë dhe të mjedisit, prej më shumë se 35 vjetësh, si dhe më shumë se 15 vjet në arsimin e lartë. Eksperienca e saj përfshin disa institucione kërkimore dhe shkencore të vendit, si Instituti i Perimeve dhe Patates, Tiranë, (2002-2006), Qendra e Transferimit të Teknologjive Bujqësore Fushë-Krujë (2006-2012), Agjencia e Mbrojtjes së Konsumatorit, pranë Bashkisë së Tiranës (2012-2015), etj. Ka kryer, gjithashtu, një sërë trajnimesh e kualifikimesh pasuniversitare, brenda e jashtë vendit, si në University of Missouri – Columbia dhe Michigan State University, ShBA, Egjipt, Çeki, etj. 

Në vitin 2017, është certifikuar si eksperte mjedisi për hartimin e raporteve të VNM, kryerjen e auditimeve mjedisor, hartimin e ekspertizave për problemet mjedisore, etj.

Paralelisht me veprimtarinë bazë të saj profesionale, Prof. Susaj ka qenë e angazhuar në procesin e mësimdhënies si personel akademik me kohë të plotë dhe të pjesëshme pranë institucioneve publike e private të vendit, si Universiteti Polis (2015-2022), Universiteti “Fan S. Noli”, Korçë (2011-2015), Universiteti i Prishtinës "Hasan Prishtina", Prishtinë, Kosovë (2013-2014), Institucioni i Arsimit të Lartë Privat, Shkolla e Lartë “Nëna Mbretëreshë Geraldinë”, Burrel, (2009-2011), dhe Universiteti Bujqësor i Tiranës (2006-2009). Ajo ka qenë udhëheqëse e rreth 30 temave të diplomës në programet Bachelor në “Studime Mjedisore” dhe "Master i Shkencave" në Menaxhim Mjedisor Urban në Universitetin Polis, si dhe bashkëudhëheqëse e dy doktoratave, Universiteti Polis në bashkëpunim me Universitetin e Ferrarës, Itali.

Është autore e bashkëautore e 12 librave shkencorë e profesionalë, dy monografive, njëra nga të cilat e botuar në 7 gjuhë të huaja, dhe një kapitulli libri, publikuar nga Oxford Publishing House. Aktiviteti kërkimor dhe shkencor i Prof. Asoc. Dr. Elizabeta Susaj përfshin gjithashtu 54 artikuj shkencorë, disa nga të cilët të vlerësuar me faktor impakti, Scopus ose Web of Sciences, si dhe 58 pjesëmarrje me prezantime në konferenca e simpoziume shkencore kombëtare e ndërkombëtare, të publikuara në Proceeding dhe Abstract Book. Është anëtare e Bordit Editorial të American Journal of Environmental Science and Engineering, anëtare e Bordit Editorial të SCIREA Journal of Environment, anëtare e Bordit Editorial të Online International Interdisciplinary Research Journal (OIIRJ), anëtare e Bordit Këshillimor të International Education E-Journal,  anëtare e përherëshme e Akademisë Shqiptaro-Amerikane të Shkencave,  dhe anëtare e disa shoqatave shkencore kombëtare e ndërkombëtare, si anëtare e International Society for Development and Sustainability (ISDS), Japoni, Balkan Environmental Association (B.E.N.A), BALOWIS Association,  International Federation of Agricultural Journalists (IFAJ), Albanian Association of Agricultural Journalists (AAAJ), etj. Njeh dhe përdor shumë mirë disa gjuhë të huaja, si Anglisht, Rusisht, dhe më pak Greqisht, Arabisht dhe Italisht.